12/04/2016. O salón de actos da Casa da Cultura, de San Ciprián, encheuse onte durante as actividades musicais do programa promovido polos IES Ilal de Sarón e Marqués de Sargadelos.

O salón de actos da Casa da Cultura, de San Ciprián, estivo repleto de asistentes durante actividades musicais celebradas onte dentro do programa promovido polos institutos de Secundaria Illa de Sarón, de Xove, e Marques de Sargadelos, de San Ciprián. Nesta iniciativa colaboran as concellerías de Cultura de Cervo e de Xove.
De 11 a 12 da mañá na Casa da Cultura desenvolveuse un obradoiro de percusión para o alumnado de 4º da ESO dos IES Illa de Sarón e Marqués de Sargadelos. E a continuación tivo lugar un concerto didáctico de percusión a cargo da formación Omar Percussion Group para todo o alumnado de Primaria e Secundaria dos centros IES Illa de Sarón, CEIP Pedro Caselles Rollán, IES Marqués de Sargadelos, CEIP de Cervo e CEIP Nº 1 de Cervo. Os actos contaron coa presenza da concelleira de Educación e Cultura en Cervo, Dolores García Caramés.
As actividades deste programa continuarán o día 28 deste mes, xoves, de 11:45 a 13 horas no Pavillón de Deportes de Xove, onde se conmemorará o Día Internacional da Danza con diversas actuacións.