O CONCELLO DE CERVO INVISTE PRETO DE 50.000 EUROS NA MELLORA DA ACCESIBILIDADE EN RÍO COBO

O rexedor e a edil de Obras estiveron supervisando a actuación que se centra na contorna da urbanización Vía Láctea

O Concello de Cervo destinará preto de 50.000 euros   na mellora da accesibilidade e da seguridade en Río Cobo, en concreto na contorna da urbanización Vía Láctea.

O rexedor, Alfonso Villares, e a tenente alcalde, Dolores García Caramés, achegáronse ata a zona para supervisar os traballos que comezaron esta semana e que están financiados ao 60% ao abeiro do Fondo de Compensación Ambiental da Xunta de Galicia.

Tal e como explicou Villares a obra contempla a renovación parcial da rede de saneamento –separando augas residuais e pluviais- e a execución de novas beirarrúas, mellorando substancialmente as condicións de accesibilidade e a seguridade, tanto do tráfico rodado como dos peóns.

Villares apuntou que se trata dunha actuación importante para este núcleo, “tentamos que as inversións públicas cheguen a cada recuncho do noso concello, dotándoo de servizos e infraestruturas que o fagan máis atractivo para vivir; traballamos decididamente para elo”.