A cita deportiva está organizada polo Club local que dá nome ao evento coa colaboración do Concello de Cervo
Está prevista unha andaina de 13 quilómetros, un trail curto de 16 quilómetros, e outro de 25 quilómetros
A saída e a meta serán na Praza dos Campos, en San Ciprián
A inscrición poderase formalizar ata o 5 de xuño en www.ccnorte.com
O Concello de Cervo acollerá a terceira edición do Trail A Fume de Carozo o domingo, 8 de xuño, a partir das 10:00 horas.
A cita deportiva foi presentada pola rexedora, Dolores García Caramés, e por unha representación dos membros do club local A Fume de Carozo, na contorna da Praza dos Campos, onde será a saída e a meta da competición.
Tal e como explicaron desde a organización, haberá unha andaina de 13 quilómetros cun desnivel aproximado de +300 metros, un trail de 16 quilómetros cun desnivel aproximado de +600 metros e un trail de 25 quilómetros cun desnivel aproximado de +1000 metros.
Nos trails tan só poderán participar as persoas maiores de 18 anos, pero a Andaina si que estará aberta para menores coa correspondente autorización do pai, nai ou titor/a.
Toda a información relativa ao evento e a inscrición está dispoñible a través da ligazón:
Todas as persoas inscritas recibirán un agasallo, e a inscrición inclúe seguro, avituallamento, dorsal e servizo de duchas.
En ámbolos dous trails haberá trofeo para os tres primeiros clasificados, tanto na categoría masculina como feminina; e premiarase oa mellor e á mellor atleta na categoría absoluta (18-39 anos), veteranos A (40-49 anos) e veteranos B (de 50 anos en diante), ademais haberá un trofeo específico para o mellor clasificado e a mellor clasificada local.
Desde o Concello de Cervo animan a desfrutar desta proba xa consolidada como un dos eventos deportivos máis destacados do municipio e que combina natureza e deporte nun mesmo escenario.
A alcaldesa quixo poñer en valor o esforzo que hai detrás do evento por parte dos membros e colaboradores do club de trail A Fume de Carozo, poñendo o foco na importancia de “seguir apostando por este tipo de iniciativas que ademais de ser un escaparate turístico de primeira orde, dinamizan a vida das nosas vilas, e fomentan tamén hábitos de vida saudables, sempre cun respecto absoluto pola nosa contorna”.
-
A actuación supón un investimento superior aos 120.000 euros procedentes do Plan Único
O Concello de Cervo traballa estes días na mellora e acondicionamento das vías de comunicación do Lugar de Motín, na parroquia de Castelo.
A alcaldesa, Dolores García Caramés, xunto ao concelleiro de Zona Rural, Adrián Arias, achegáronse este mediodía ata a zona en compañía do pedáneo, Jesús Otero, para supervisar in situ a obra que supón un orzamento superior aos 120.000 euros -123.282,76 concretamente- procedentes do Plan Único.
Tal e como explicou estase a actuar sobre unha superficie de 2260 metros lineais “unha obra que suporá a renovación integral do firme de varios tramos que se atopaban deteriorados e unha importante mellora para a calidade de vida da veciñanza, garantindo un acabado duradeiro e unha maior seguridade viaria e facilitando a mobilidade tanto para os particulares como para os vehículos agrícolas”.
Este tipo de proxectos –afondou- reflicten o noso compromiso co rural, co equilibrio territorial e coa mellora continua das nosas infraestruturas municipais “seguimos apostando pola vertebración do noso territorio poñendo o foco na busca do equilibrio estre todas as zonas do noso concello, sexan rurais ou urbanas”.
A cita está organizada pola asociación de Mulleres Rurais As Espalladoras, a asociación de veciños de San Román de Vilaestrofe e Airiños do Xunco, coa colaboración do Concello
O encontro celebrarase no Pavillón de San Román a partir das 18:30 horas, e contará coa participación de Cordenaia, As Grileiras, As Ferriñas, As Faíscas, a asoc. Cultural Osorio Gutiérrez, e Erikas e Peluxías
O pavillón de San Román acollerá o próximo 17 de maio, con motivo do Día das Letras Galegas, o II Festival Espallando Letras, organizado pola asociación de Mulleres Rurais As Espalladoras, a asociación de veciños de San Román de Vilaestrofe, e Airiños do Xunco, coa colaboración do Concello de Cervo.
O encontro terá lugar a partir das 18:30 horas e contará coa participación de Cordenaia, de Airiños do Xunco (Cervo); As Grileiras que son o grupo infantil da S.C.R. Ledicia (Burela), As Ferriñas e As Faíscas de Os do 21 (O Vicedo), a asociación cultural Osorio Gutiérrez (Lourenzá) e Erikas e Peluxías (Grupo de Falapandeireta na Escola Vella de Rinlo).
Ademais haberá racións de empanada e bolos preñados a prezos populares durante a tarde.
A cita foi presentada pola tenente de alcaldesa, Mali Méndez, o edil de Zona Rural, Adrián Arias e por representantes das asociacións organizadoras ante a Casa do Concello.
Desde o Concello de Cervo convidan a veciños e visitantes a participar neste encontro fermoso e significativo para as nosas letras, a nosa cultura e as nosas tradicións, e que é un reflexo da riqueza cultural da bisbarra; “o noso agradecemento ás asociacións que o fan posible”.
Ademais, nesta ocasión no que as Letras Galegas rende homenaxe a toda unha tradición viva e moi nosa: ás cantareiras e á poesía popular galega, e que mellor maneira que celebralo que con este festival que mantén viva esa parte tan importante do noso patrimonio cultural.
As persoas participantes poderán presentar un máximo de dúas fotografías, relacionadas co medio ambiente, inéditas e orixinais, tomadas en calquera lugar de Galicia
Establécese un primeiro e un segundo premio, e tamén haberá un premio Top Cervo, á mellor instantánea sacada nalgunha localización do municipio
O Concello de Cervo, a través da delegación de Medio Ambiente, convoca o XV concurso fotográfico de medio ambiente “Cervo Respecta 2025”.
Os participantes poderán presentar un máximo de dúas fotografías, baseadas na temática xenérica do medio ambiente, inéditas e orixinais, sacadas en calquera lugar da Comunidade Autónoma de Galicia. Terán que ser imaxes de natureza viva, que sirvan de exemplo de conservación do noso medio.
Deberanse presentar en formato dixital (JPEG), en alta calidade, a unha resolución mínima de 2.048 px. sen limitación de tamaño en MB; a través do correo medioambiente@concellodecervo.com.
O prazo para presentar as imaxes remata o 23 de maio.
Hai tres premios establecidos. Un primeiro, un segundo, e o premio “Top Cervo” á mellor fotografía na que se identifique claramente algunha localización do municipio; dotados todos eles con figuras de cerámica de Sargadelos.
O fallo do xurado, composto por tres membros competentes na materia, farase público o 5 de xuño, coincidindo co Día Mundial do Medio Ambiente.
O certame, cuxa publicidade está ilustrada coa foto que se fixo co primeiro premio no 2024 -Cea ao Atardecer de Anxo Cao- foi presentado pola edil de Medio Ambiente, Mali Méndez, e polo concelleiro de Zona Rural, Adrián Arias, que animan a todos os amantes da fotografía a que participen no concurso que é “unha chamada tamén á reflexión, convidándoos a que collan as súas cámaras e capten eses momentos que reflictan o respecto, a beleza e tamén os retos que afronta a noso medio ambiente”; ao tempo que nos permitirán coñecer o seu traballo compartindo a súa mirada, e tamén descubrir lugares e situacións únicas, como sempre fan edición tras edición nesta iniciativa que “naceu para poñer en valor a nosa contorna natural e fomentar unha conciencia máis respectuosa co medio”, apuntaron.
A feira de artesanía abrirá ao público ás 11:00 horas, haberá un paseo guiado por Cervo e sucederanse diferentes actuacións de música tradicional, pasa bares e diferentes obradoiros e sorteos durante a xornada.
A sesión vermú correrá cargo de A Requinta de Lampai, e á noitiña actuará Ailá, seguida de foliada libre e queimada
O Concello de Cervo anima a veciños e visitantes a asistir o sábado, 3 de maio, á IX Foliada e á Feira de Artesanía que terá lugar na Praza do Souto, durante todo o día.
A cita foi presentada pola alcaldesa, Dolores García Caramés, representantes da Deputación, e por membros da A.C. Recreativa Fervenza de Sargadelos, da agrupación Fol do Raxal e A Morena, que organizan o evento no que colabora, como cada edición, o Concello de Cervo.
O día está repleto de actividades diversas pensadas para desfrutar con amigos e familia.
Ás 10:00 horas haberá un obradoiro de formas de tocar o pandeiro e a pandereita a cargo de Noemí Basanta, que dará paso á apertura da Feira de Artesanía.
Tamén pola mañá haberá unha visita guiada por Cervo ás 11:00 horas da man de Guido Guía.
Ao mediodía, arrincarán os cantos de taberna coa participación de agrupacións de diferentes puntos da bisbarra.
A continuación está prevista a sesión vermú coa Requinta de Lampai.
Xa pola tarde, haberá un obradoiro de baile tradicional a cargo de Marcos Botana e outro de Enredos Musicais de Oli Xiráldez. Tamén haberá na Praza do Souto Xogos Populares con Xogando nas Nubes.
Ás 18:00 horas, será a Foliada.
Como peche de festa, ás 22:00 horas, terá lugar o concerto de Ailá, seguido de Foliada Libre e Queimada.
A alcaldesa, Dolores García Caramés, quixo animar a veciños e visitantes a que se acheguen a desfrutar desta xornada en Cervo, na que se mesturan tradición, cultura e artesanía “nunha contorna privilexiada como é a capitalidade municipal"
A rexedora tamén quixo felicitar á organización, A Morena, Fervenza de Sargadelos e Fol do Raxal, que “son todo un exemplo da riqueza cultural e asociativa que temos no noso municipio"
poñendo o foco na “capacidade para reunir a unha representación importante da riqueza folclórica tradicional da contorna” e deulles os parabéns polo seu traballo incansable e pola ilusión que poñen en manter vivas as nosas tradicións. Grazas a iniciativas coma esta, seguimos celebrando a nosa identidade, a nosa música, e a nosa tradición con orgullo, apuntou.
Anímovos a todas e todos a achegarvos, a gozar da festa, e a compartir momentos únicos nesta Foliada feita con agarimo e raíces, que nos conecta co mellor da nosa terra, sentenciou.
